|
Auctor - Editor - Translator
Textuum Latinorum
|
|
Domus editoria
|
|
In domo editoriâ, quae dicitur LEO LATINUS, êduntur
litterae Latinae omnium aetatum et lexica et litterae secundariae ad
Latinisticam spectantes.
LEO LATINUS publicat libros audibiles et discos compactos textuales.
Textûs colligati aut typis impressi a nobis non publicantur nisi
per exceptionem.
1. LIBRI AUDIBILES
Lingua Latina non est emortua: Ex quo Imperium Romanum interiit,
numquam tempus fuit, quo non essent homines, qui Latine cogitarent,
loquerentur, scriberent.
Discipuli si experiuntur linguam Latinam vivâ voce pronuntiatam
- paratiores sunt ad eandem discendam
- facilius discunt vocabula atque grammaticam
- melius intellegunt textuum classicorum compositionem poeticam atque
rhetoricam.
His decenniis permulta opera sunt publicata, quibus auctores
perscrutarentur pronuntiatum Latinitatis classicae. Tamen adhuc
maximê desunt Latini libri audibiles, quibus classica
pronuntiatio restituta constanter convenienterque adhibeatur.
LEO LATINUS id sibi proposuit, ut opera litteraturae Latinae antiqua et
mediaevalia et recentiora in formam librorum audibilium redacta faceret
accesssibilia.
2. EDITIONES TEXTUUM (CD - ROM)
2.1 Editiones textuum Latinorum omnium aetatum
LEO LATINUS tibi offert textûs Latinos omnis generis, qui in
bibliopoliis non prostant venales. Tales sunt novae editiones criticae
et commentarii textuum antiquorum, mediaevalium, neolatinorum, quorum
nulla potest accipi editio recentior.
Tales editiones textuum saepe instructae sunt versione theodiscâ
aut aliâ versione in linguam recentiorem factâ.
Inter publicatos libros neolatinos referendi etiam sunt textûs ab
ipso LEONE LATINO compositi, qui praecipue spectant ad philologiam et
historiam cultûs civilis et ad scientias naturales.
2.2 Opera modernae litteraturae in Latinum conversa
Inter opera a LEONE LATINO publicata maioris momenti sunt versiones
litterarum modernarum Latinae.
Quibus legendis amatores linguae Latinae modis quam plurimis
delectantur (eaedem praecipuê sunt versiones operum narrativorum,
velut fabellarum, fabularum novellarum et romanicarum).
Is qui linguam Latinam discit, talibus versionibus legendis pernoscit
peculiaritates grammaticas atque stilisticas, quibus lingua Latina
differat a linguâ originali.
Iisdem versionibus evidenter apparet, lingua Latina quam versatilis sit
atque multiplex, praesertim, quam apta sit ad reddendas cogitationes
modernas.
|
|
|
|
De
auctore
Lectrix lectorve maxime honorabilis,
magnas gratias tibi ago, quod studes pernoscere
ministrationem Latinam a me praebitam. Haud scio an quaeras, quomodo
mihi in mentem venerit haec res aliquatenus insolita, curnam praebeam
discos textuales et libros linguae antiquae interpretandae, quam multi
homines per errorem putent esse emortuam. Itaque permittas, quaeso, ut
tibi breviter referam, usque nunc quibus rebus studuerim noscendis et
docendis provinciam linguae litteraturaeque Latinae perlustrans.
Alumnus Universitatis Saraviensis studui philologiae Latinae,
biologiae, phoneticae, indogermanisticae pernoscendis; anno autem 1987
dissertatione philologiae Latinae perscriptâ ad doctoris gradum
promotus sum.
Ab anno 1981 usque ad annum 1989 in Sede operarum Neolatinitatis (cui
praefuerunt Professor Dr. Christianus Helfer et Pater Dr. Caelestis
Eichenseer) moderatus sum Colloquio Latino habendo, Seminario, in quo
disputabatur de Latinis auctoribus aetatis humanisticae et
posthumanisticae, velut de Petrarca, Erasmo, Moro, Copernico, Bacone,
Campanella, Cardano, Hobbesio. Praeterea adiuvi Professorem Helfer tres
editiones Lexici Auxiliaris Germanico-Latini curantem.
A. 1994-2002 in Coreanâ Universitate Seulensi Nationali curavi,
ut
candidatos promotionis doctoralis imbuerem methodis philologiae
classicae praecipuîs. Seminarium enim habui philologiae Latinae,
quod
spectavit ad Ciceronem, Plautum, Terentium, Lucretium, Vergilium,
Manilium, Tacitum, Senecam, Augustinum, necnon ad Abelardum, Petrarcam,
Erasmum. Quâ in institutione cum studentibus colloquebar
linguâ Latinâ.
His viginti annis in periodicis commentariis Latinis (quales sunt
Ephemeris,
Latinitas, Lupa, M.A.S., Melissa, Retiarius , Rumor
Varius, Vox Latina) publici iuris feci numerosas symbolas Latinas.
Quibus symbolîs praecipuê tractavi artem criticam,
lexicographiam,
naturalium scientiarum terminologiam atque litteraturam, necnon
modernas narrationes fabulasque Romanicas in Latinum conversas.
A Fundatione Melissae Bruxellensi in lucem edita sunt quattuor opera
mei
Latina, tria opera e Germanico sermone in Latinum conversa, quae sunt Aranea nigra fabula novella
leremiae Gotthelf et Baro Mynchusanus
liber puerilis Erici Kästner
et Fragrantia fabula Romanica Patricii
Süskind, necnon Glossarium
Fragrantiae
a me originaliter Latinê scriptum.
Paginis sequentibus te certiorem faciam de versionibus textuumque
editionibus a me praebendis. Pro omnibus rebus a te benignê
monitis et
propositis et commendatis gratias tibi agam ineffabiles; ceterum tibi
exopto, ut quam maximê oblecteris linguâ
litteraturâque Latinâ
perfructus.
Vale pancraticê !
Dr Nicolaus Gross
|
|
|
|